កាលពីថ្ងៃទី២៧ ខែកុម្ភៈនេះ មូលនិធិក្រុមប្រឹក្សាអាជ្ញាកណ្ដាល រៀបចំពិធីអបអរសាទរកិច្ចព្រមព្រៀងស្ដីពីការផ្តល់ជំនួយពី ស្ថានទូតស៊ុយអែត និងទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ គាំទ្រដល់ មូលនិធិក្រុមប្រឹក្សាអាជ្ញាកណ្ដាល ប្រកបដោយភាពរឹងមាំ និងឯករាជ្យភាព។ ពិធីអបអរសាទរនេះ មានការអញ្ជើញចូលរួម ពីតំណាងក្រសួងការងារ និងបណ្ដុះបណ្ដាលវិជ្ជាជីវៈ តំណាងក្រសួងសេដ្ឋកិច្ច និងហរិញ្ញវត្ថុ តំណាងពីស្ថានទូតស៊ុយអែតប្រចាំនៅកម្ពុជា តំណាងទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ តំណាងអង្គការអន្តរជាតិខាងការងារ តំណាងសមាគមរោងចក្រកាត់ដេរនៅកម្ពុជា តំណាងសហព័ន្ធនិយោជក និងសមាគមពាណិជ្ជកម្មកម្ពុជា តំណាងសម្ព័ន្ធសហជីព សមាជិកសមាជិកាក្រុមប្រឹក្សាអាជ្ញាកណ្ដាល និងបុគ្គលិកមូលនិធិក្រុមប្រឹក្សា។
ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ បានបន្តផ្តល់ជំនួយមូលនិធិថ្មីចំនួនទឹកប្រាក់ប្រមាណ ១លាន ៥សែនដុល្លារសហរដ្ឋអាមេរិក សម្រាប់រយៈពេលប្រាំឆ្នាំ ដល់មូលនិធិក្រុមប្រឹក្សាអាជ្ញាកណ្ដាល តាមរយៈដៃគូអភិវឌ្ឍន៍យូរអង្វែងរបស់ខ្លួនគឺមជ្ឈមណ្ឌលសាមគ្គីភាព។ មូលនិធិនេះជាផ្នែកនៃគម្រោងថ្មីមួយរបស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិប្រចាំនៅកម្ពុជា ស្ដីពីសិទ្ធិការងារនៅកម្ពុជា។ ស្ថានទូតស៊ុតអែត បានចុះហត្ថលេខាផ្តល់មូលនិធិសរុបចំនួន ៥លានក្រូណា (ប្រមាណ៥៣ម៉ឺនដុល្លារសហរដ្ឋអាមេរិក) សម្រាប់អនុវត្តគម្រោងរយៈពេល២ឆ្នាំ (២០២០-២០២១)ដើម្បីលើកកម្ពស់ប្រព័ន្ធមជ្ឈត្តវិនិច្ឆ័យដោះស្រាយវិវាទការងារដោយអាជ្ញាកណ្ដាលដែលអាចជឿជាក់បាន និងប្រកបដោយប្រសិទ្ធិភាព៕